Pupuh Durma
1. Gung ampura atur titiang ring pamiarsa, antuk
tambet titiang puniki, astu tan ke cakra bawa, wantah mawosan sanghyang atma,
sasidan titiang ngaturin, inggih punggelang, sane mangkin kekawitin.
Pupuh Semarandana
1. Ring panumayan
sampun prapti, katon warong kurungan nya, dumilah warong hyang atma, tangkejut dane hyang atma, saking uning ring kemoksan,
nenten sue raris enduh, uduh niki sriran titiang.
2. Metu eling
sang atma malih, ring kekurungan utama, nenten pisan kadroponan, alus baivose
sang atma, mantuk ring sang kinasihan, sang atma sarat ngrumrum, sane mangkin
kekawitan.
3. Uduh dewa dahat luwih, genah titiang mlajahang
raga, ring idewa nenten siyos, beli tan lali ring idewa, witsangkaning
panumayan, titiang pamit mangkin ratu, mogi
idewa katemu riwekas.
4. Hyang atma ngewehin margi, mantuk ring kekurungan
nya, uduh adi jwa idewa, mulih i dewa
ring geni utama, ring bayu jala pertiwi
muah, rika dewa jua manyusup, nangun
kerti sane utama.
5. Dewa meyasa rin pertiwi, ring kayune rumusupa,
rumusup dewa maring wdon, rumusup who-wohan ring umbiyan, anyusupa maring
garba, mapreyoga ring sang ibu, matemahan jwa amerta.
6. Maring angina dewa makerti, anyusupa ring manusa,
maring weteng jua manyusup, matemahan sanji wania, ngawetuang rasa ring sarira,
ngardi kesempurnaan hidup, mangkin titiang ngalahin idewa.
Pupuh Adri
1.
Kacerita
upakarane wus puput, ring tepin layon, kepanggih ring sanghyang atma, bubu
pirate luwir ipun, nasi takilan pasepan murub, sekar ura panjang ilang a prangkatan,
tuak arak ulam itik sampun tumut, darpana adi sejangkepnya, darpana alit nyatur
desa.
2.
Pasucian
toya kumkuman sampun, sami ring plangkane, upakara sang pelatra, akweh tamyu
para menak riku, pasliweran pada matulung, wenten sane alungguha, para santi ngaji
playon lwir kidung, tetangguran tan pepegatan, angklung luwang sinawuran.
3.
Ambun
asep mapulpul-pupul, ebek ring ambara, sanghyang atma eling ring raga,
idepnyane pacang mapitutur, maituturin pianak cucu, miwah kadangnya ne uripa,
sanghyang atma sedih bekut, pan tan sida mangucap, sira pacang anggen jalaran.
4.
Wenten
jadma warnan nyane alus, sanghyang atma, manyusup ring sarirannya, pan sang
atma rin aji wus weruh, baan engsape jadma puniku, tangan suku bebuyutan, raris
ngucap banban alus, sang miarsa engsek ring angga, miragiang sang kelaran.
Pupuh
Ginada
1.
Pangucape sang kelaran,
katuju ring sang kantun urip, uduh nyama ajak makejang, tan prasida nutug
tuwuh, titiang mangkin sampun pejah, mengalahin, nyama braya pianak sumah.
2.
Sape sira pacang sueca, manah
titiang matempahin, pianak cucuk kantun alit, maring sira titiang sadu,
titiaang jadma tan paguna, tuna kanti, turin nista arta brana.
3.
Banget titiang nunas ampura,
ndaweg titiang kantun urip, akweh ngardi ucap para, mangda sampun menggah ring
kayun, wantah bekel titiang menjadma, tan luput ring, iwang patut sugih tiwas.
4.
Ida dane sinamian, ring
paswecan sane nguni, katiba ring sikian titiang, tan sida baan titiang mundut,
mangkin titiang sampun pejah, sampun pasti, dados bekel rawuh kawekas.
5.
Mangkin titiang nunas ica,
ring ida hyang prama kawi, moga dewa dirgayusa, akweh boga tur rahayu, dumadak titiang
riwekas, katemu malih, masawitra ring I dewa.
6.
Mangkin wenten pemanes titiang,
majeng ring ida dane sami, mungguing kakurungan titiang, sane leteh pacang katur,
sarengin sentanan titiang, pacang ngaci, mangda dados prelina.
7.
Uduh cening nyah I bape,
suwud cening sedih kingking, wireh sangkan panumayan, bapa ngalahin cening
bagus, jani bapa mapewrah, apang cening, menyama braya ingetang.
Pupuh
eman-eman
1.
Pelapanin ngaba awak, eda
cening drenggi cinging, patilesang awake tuara, nistan bape cening mundut, eda
emed nunas ica, ring hyang widhi, apang mangguh dirgayusa.
2.
Nyama kanti anggon rerama,
pisagane gelantingin, eda ngawe sebet anak, pang eda dadi tanggun tutur, tekek
bintil tutur bape, anggon gending, nah amonto pragat.
3.
Uduh pandita mautama, suskman
titiang nenten dugi, ri wus titiang ke jaya jaya, ketiwakin tritan sang wiku,
sarirane dados ingan, leteh sami, kadi toya dados hima.
4.
Mogi ratu kerahajengan, miwah
putra putu sami, ampura pemargin titiang, sarin darpana titiang ngelungsur,
peresikan toya kumkuman, mangda suci, tan patlutuh dewek titiang.
5.
Kagiat sampun ngalesuang,
jadma sane kasusupin, paliyanya kadi gawang, semunnya lek turin kimud, kabunbun
ring jadma katah, sane mangkin, ngadika ida sang pandita.
6.
Uduh pianak putun sang ilang,
ajak makejang nyumbah cening, sang atma ayat mejalan, sami parek lawut
metimpuh, manyumbah ring sang aninggal, sambilang ngeling, nyambat nyambat sang
aninggal.
7.
Uduh bapa cingak titiang,
pangubaktin titiange sami, becik bapa jua mejalan, tangkil ring pramesti guru,
madak ica ida nugraha, ngewehin margi, mangda bapa mangguh swarga.
Pupuh
Demung
1.
Kagiat sang atma mabur ring
ambara, wawu lepas ring sariran ipun, presentana ngajap-ajap, manulame nungtung
tangis, bapa titiang sat anaking ayam, katinggalan antuk induk, tan urungan titiang
kelaran, manah enyag tan sinipi, bapa naka panedungan, mangkin sampun ngalahin
lampus.
2.
Akweh nyama pisaga ngajap
ajap, satsat punyan bingine atub, tan urungan kepanesan, duwaning mangkin
sampun basmi, uduh bapa sang meraga atma, mogi riwekas malih matemu, menjadma
ring mercepada, mamuponin sarin jagat, ne mangkin becik memarga, swarga bwana
gelis kepangguh.
Pupuh
semarandana
1.
Kagiat mangkin sang atma luih, jumujug maring
pamrajan, tangkil ring hyang pramesti guru, aturannyane alus banban, duh
pakulun subaktin titiang, aksi pengastawan ulun, suweca ugi anugraha.
2.
Duh betara guru pramesti, titiang
pacang ngelungsur pamita, ri bukpadan palungguh I ratu, mangda tan keneng
upadrawa, ledang I ratu mapaica, panugrahan kapituhu, anggen titiang serahina.
3.
Ne mangkin dados atma luwih,
pundut titiang kayang kawekas, malih wenten pinih ungkur, titiang pacang nyujur
suarga, dahat banget pinunas titiang, mangda gelis jwa kepangguh, tan wenten
alang ring jalan.
4.
Semalih ratu hyang pramesti,
wenten kadi sentanan titiang, kija malih titiang sadu, picayang kerahayuan,
pianak titiang rawuhing warga, mangda ipun nugtug tuwuh, pacang ngayah ring
betara.
5.
Puput atur titiang mangkin,
pacang nyujur suarga bwana, titiang mepamit ring pakulun, mogi gelis malih
mangjadma, meriki ring mercepada, ngatur ayah ring I ratu, sane mangkin titiang
pamita.
Pupuh
Sinom
1.
Betara purwaka ngandika, uduh
cening sang atma luwih, wastu cening mangguh suarga, moga tan kalang ring
margi, nah mejalan I dewa mangkin, tangkil ring pura dalem dumun, bakti I dewa
ring Hyang Durga, pengandikan Hyang Pramesti, suksma ingsun, pamit titiang ring
betara.
2.
Sampun puput ida ngandika,
sang atma raris mepamit, sumurup ida Hyang Surya, maka cihna sampun wengi, sang
atma gelis menangkil, pura daleme katuju, wenten suara ngelur ring setra, kadi
suaran singa murti, ngulun-ulun, dahat tangkejut Nyang atma.
3.
Kagiat ida hyang atma, ring
kori dalem ngeranjing, ngraris tangkil ring betara, ri sedek ida betari,
ketangkilan rencang sami, bebutane sami kumpul, njek pupu anja-anja, malinggih
ring sor hyang betari, sami nguntul, mirage sabdan hyang durga.
Puh
Ginada
1.
Kmangmang rare gok papengka,
I kalika reregek malih, nganteng ida hyang atma, sinarengan mangerubung,
idepnyane pacang nadah, dahat nyejehin, raris memarga hyang atma.
Puh
Bebasuran
1.
Umedek ring sanghyang durga,
ke aksi dening betari, wenten atma tangkil, betari ngandika arum, maring sang
meraga atma, atma ngasih, lungguh ring sor betari durga.
2.
Uduh cening sang hyang atma,
brecala tan sandang jejehin, cening atma tan padosa, ring kemoksan tatas weruh,
lwir cening luwih dahat, sabdan hyang dewi, sang atma egar ring manah.
3.
Sang atma matur sembah,
mantuka ring hyang betari, om mustikaning baktin titiang, ring bukpadan
pakulun, betari dewan manusa, atma malih, sekancan bregala muwah.
4.
Sanghyang bagawanti ngaran,
ring bale agung malinggih, micayang ke dirgayusan, yan ring setra gandamayu,
sanghyang durga parab I dewa, hyang betari, ngrahajengang para atma.
5.
Hyang Berawi parab paduka,
ring pamuhunan malinggih, ring gunung agung lugguha, giriputri parab pakulun,
jagat bali nyungsung hyang, danu dewi, ring batur linggih I dewa
6.
Ring telaga mwah pancoran,
mapuspata dewi Gayatri, ring tukad agung maligga, Dewi Gangga aran pakulun,
bethari ring ulun sawah, bethari seri, ngardi sekatahing entikan.
7.
Dahat luwih wimban paduka,
ring buana agung miwah alit, inggih mangkin ingsun uninga, wenten aturan
sentanan ulun, sekar arum mwah pajegan, punika sami, wantah katur ring betara.
8.
Sapunika nenten iwang, mangda
arsa hyang betari, kwanten ledang mepaica, panjang yusa tur rahayu, sane
mangkin atur titiang, titiang mepamit, pacang nyujur swarga bwana.
Pupuh
Sinom
1.
Mesabda ida Hyang Durga,
sabda nyane alon manis, ngardi ledang sanghyang atma, uduh cening sang atma
luwih, rarisang cening memargi, wastu gantar pacang nyujur, swarga bwana ne
utama, sekancan penyadak asih, ring gua gunung, miwah alas madurgama.
2.
Tan kocapan sanghyang atma,
matur nganjali mepamit, pemargine sada dabdab, ngejabayang saking candi,
wintang siang manyuluhin, maring wetan ida metu, kadi nuturang hyang surya,
ayat medal sane mangkin, sinah sampun, rahina ngedas lemah.
3.
Ngaja kanginan hyang atma,
margine asri kemarginin, kacingak olih sang atma, sekare ring tepining margi,
ambun nyane merik sumirik, waluya manyusur irung, raris medal sanghyang surya,
angine rawuh ngusirsir, egar kayuh, sang atma raris ngencolang.
4.
Paksine pada masuara, pedem
nyane ketinggalin, wenten sane nyusur sekar, who taru wenten ke ungsi, ipudak
dahat ngedanin, Bungan nyane miyik ngalub, I tambulilingan magriyungan, sat
pujan ida sang resi, lintang anut, rikalaning nyurya swana.
5.
Pemargin ida sang atma, tukad
serayu keungsi, wenten batu lempeh petak, taru cempaka ngungkulin, maidep sang
atma mangkin, masiram ring toyan serayu, kagiat wenten buaya medal, bungut
nyebak manyejehin, raris nuju, sanghyang atma ketampekang.
6.
I Buaya raris ngarepang,
idepnya nadah atma luih, tambis sang atma ketadah, yan tan gelis kakelidin,
sang atma ngandika aris, duh dewa sang jugul agung, beli uning ring I dewa,
sareng medal ngajak beli, maring ibu, ari ari pawakan I dewa.
Puh
Adri
1.
Uduh dewa sang jugul agung,
dewa sameton beline, eda adi ngalangin beli, yening patut beli pundut, dong
olasin titiang dumun, ngelintangin tukad punika, sang jugul menangis nguntul,
ikut nyane kutal kutil, singgih beli ampura titiang.
2.
Sang jugul ngenjuhang tundun,
sanghyang atma mangke, raris munggah egar ring hati, tan asuwe raris rauh, ring
tepining yeh serayu, raris tedun sanghyang atma, suksme beli, adi sang jugul,
sang atma raris memarga, mangersiania lumampaha.
Puh
Ginada Eman-eman
1.
Gelis rawuh ring tepining
wana, tangkejut sang atma yukti, wireh burone pablesat, katah paksine paburbur,
ngungsi genah sane sengka, nenten mari, suara ngelebur kapirengang.
2.
Mandeg sang atma nlektekang,
kagiat wenten raksasi, margin sang atma kempetang, matane melodlod pelud,
bungut nyebak sat gua linggah, gigine lanying, mageluran magejeran.
3.
Yang idepnya sanghyang atma,
nenten pisan ajerih, raksasi ulu ketampekang, bawosnyane banban alus, pianak
meme puniki titiang, sampunang jahil, ngandeg pejalan titiang.
4.
Genah meme tuah yukti, dahat
luwih tan kasorang, puniki titiang pacang nyujur, swarga sane mautama, sang
raksasi, ngandika ring sanghyang atma.
5.
Mogi I dewa polih genah,
sawireh I dewa atma luwih, tatas ring aji kelepasan, uduh cening meme cumpu,
raksasi ulu makipekan, sarwi ngeliling, katah taru sane balbal.
6.
Sang atma raris lumampah,
ring spirit gunung memargi, kacunduk ring macan galak, sang atma ngandika alus,
eda dewa nyadak titiang, titiang puniki, semeton idewa sane nguni.
7.
Genah I dewa maring rah,
ndaweg beli mijil ring kundi, rika dewa sareng medal, punika witnyane malu, I
samong kadi ngeresepang, lawut nyingkir, raris ipun matinggal.
8.
Carita sang atma mamarga,
sarwi ngisep ambu miyik, katah sekar nedeng kembang, kajenkan sang atma
ulangun, kagiat makecos ya ikidang, kadi mapagin, sapangerauh sanghyang atma.
9.
Mangigel ipun I merak, I
belatuk bengong mebalih, kebatek baan legannya, ngantenan sang atma rawuh, I
lelipi pada ngadang, kancit kepanggah, asu ireng ngarepang.
10. Mesaput
sayong maceblengan, gede tegeh kadi bukit, sang atma raris ngandika, pengucape
dabdab alus, uduh adi nyaman titiang, titiang puniki, pacang ngungsi moksa buawana.
11. Mangkin
beli manuturang, indik adi miwah beli, yeh nyom peragan I dewa, sinarengan
lekad mapunduh, sang asu selem mirengang, nungkruk sedih, yeh matane tan
papegatan.
12. Kesilapin
punika hyang atma, ikut nyane kutal kutil, mojar ring sajeroning arsa, wastu
beli gelis rawuh, irika ring swarga buana, titiang ninggalin, memarga sira
hyang atma.
13. Sampun
tajep sanghyang arka, rupan sang atma kadi masuci, maidep pacang mesayuban,
kesamping bulakan ditu, wenten paksi klik klik ngindang, saha mamunyi, sat
nuturang wenten prapta.
14. Ring
batu lempeh irika, sang atma masila tiding, ri kanjekane punika, akweh buta
kala rawuh, makuwug suarannya binal, ngeresing hati, tan ajerih idep hyang
atma.
Pupuh
Durma
1.
Sang atma tan mari kaiderin
butha, wenten sane nagih ngelempagin, midep maniwakang cakra, wenten mebudi
menadah, sang atma ngandika aris, ih sang butha, sampunang I dewa brangti.
2.
Duh sang bawal, sang bad
pamid, mrajassela, sang kreda luir sang badmoti, butha jigruk muah, wireh titiang
mawak atma, ring sunia genah titiang niki, merika I dewa, kaumah titiang sampun
siaga.
3.
Upakara aturan sentanan titiang,
segeh bubuh sang badmoti, sekar rura sang mrajesela, bubur pitara sang bawal
nerima, duh dewa sang buta gridig, ketipat lan segeh takilan, pengangkat
angkate malih.
4.
Panjang ilang sang bad pamid
nerima, ulam bebek tuwak malih, sang buta jigrug punika, di gelis bebutane
matinggal, ngojog purin sang atma luwih, raris nadah, caru miwah tetayuban
sami.
5.
Megancangan sang atma
lumampah, pemargine ngaler kangin, tan kocapan maring jalan, mereren nyamping
ring margi, tan pesangkan, angina baret rawuh ma ngresin.
6.
Mebya yuhan wit taru pada
balbal, angin ngelinus mlejeg ke langit, buron uyut baan jejehnya, kedis
pesliwer ring ambara, karenga suara manyerit, sang atma egar, wireh atma wicaksana
tur suci.
7.
Kaget wenten kala patpat
ngarepang, rambut barak inggel nyejehin, kedek ngakak mebyayuhan, ada atma
lakar jambal, sinah suba tulangnya ngritik, sang atma siaga, apan sang atma
kwihin suci.
8.
Uduh dewa sang jogormanik,
sang suratma, maha kala rain beli, miwah Sang Dorakala, Ida Dewa mialang titiang,
semeton beli titiang puniki, sampunang sumenia, mangkin titiang ngaturin indik.
9.
Duh dewa meparab sang
anggapatia, mrajapati, banas pati, muwah banas pati raja, sang tutur pesengen titiang,
ring papusuh sang anggapati, sabda UH suarannya, saking cangkem I dewa medal.
10. Mrajapati
maring hati I dewa magenah, saking irung I dewa mijil, sabda “EH”
surannya, banaspati mayoga ring ungsilan, saking pengaksian medal wyakti, “AH”
suarannya, sapunika mangda pasti.
11. Pinih
ungkur Sang Banas Pati Raja, maring nyali dewa melinggih, I dewa metu saking
karna, suara “IH” maka sabda, sapunika jua elingin, nah dumadak, beli adi
menampesin.
12. Beli
adi durusang dewa memarga, jumah titiang sampun siaga beli, darpana sejangkepnya, sangkala patpat mengandika, titiang ngalahin
I dewa mangkin, nah dumadak, dewa kepapag olih widiadari.
Pupuh
Adri.
1.
Mangersania sang atma lumaku,
pemargan nyane, dadbdab alus masemu asri, kadi jejaka mepayas agung, ambun
sekare nyusup cunguh, ngawe ulangun sanghyang atma, kagiat panggih pasiraman
agung, dahat suci toyane mahening, pancake, kasub ring jagat.
2.
Sanghyang atma masiram
makumur, maring telagane, raga nyalang sat kasepuhin, kocap dumun taman puniku, papiteges Ida Hyang Wisnu, lamakane sanghyang
atma, widia dara widia dari ngayunyun,
mapagin sang atma, sehananing para dewata.
3.
Para putra gada kober
kapundut, makuwug suryane, pidabdabe warna warni, pemargine bamban alus,
riantukan busana murub, tetamhan mwanti-wanti, suling rebab curing lan angklung,
saluwiring tetabuhan, tan mari gambuh lan rejang.
4.
Sanghyang Atma masuci wus
puput, ring batan kayune, malinggih sambil mengetis, wastu tangkejut ngrena
suara ngerudug, duk punika raris mejujuk, nyantos ring genahe ngetis, dewatane sami
rawuh, gargita hyang dewata, ngandika ring sanghyang atma.
Pupuh
Ginanti
1.
Uduh dewa sampunang takut,
apan dewa dewa atma luwih, wenten ling ida betara, memagpagin I dewa mangkin,
sawireh I dewa luwih darmika, kalih tatas sastra aji.
2.
Patut gelis memargi nyujur,
swragane kalintang luwih, muponin pikenoh kaluwihan, miwah sad rasane sami,
apan dewa pupating kedarman, dahat suweca ida hyang widhi.
3.
Sane tampi dewa ditu, umah
emas sane luwih, manganjali sira sang atma, atur nyane nyunyur manis, bawos
ratu banget pisan, mamuji titiang puniki.
4.
Daging suksmaning aji puniku,
titiang puniki nenten uning, semalih aji kemoksan, wantah tan uningin mami, mesabda
ida betara, tuah idewa manyingidan.
5.
Yadian dewa tuara weruh,
kebanta bolong sane yukti, dewa sampun luwihing laksana, ring jgat turmaning
bakti, pageh kukuh ring mercapada, sinah sanghyang widi asih.
6.
Tutup mangkin sampun rawuh,
ring jempana sang atma luwih, dahat dumilah ring pedapane, pepayasan sarwa
luwih, wastra dahat becik pisan, luwir gelung emas mesanggling.
7.
Sekadi magpag sang ratu, dewatane
lintang asri, mundut bebaktane samian, gegambelan minakadi, widiadari
widiadara, sinamian pada mesanti.
8.
Suaran suryake, makuwug,
kanjekan dewane memargi, marerod maring ambara, keluwihane mangenyudin, ring
margi tan kaceritayang, rawuh ring margi surge luwih.
9.
Wenten bale rika kepanggih,
irika ring ajeng candi, bale antuk candra kanta, tejane kalintang asri, irika
sang meraga atma, betarane menyiramin.
10. Risampun
puput, kejaya jaya den agelis, olih para resing wyat, ngastawayang atma luwih, raris
matur sembah, ring budpadan ida betara.
Pupuh
Adri
1.
Sanghyang atma raris lumaku, maring
purin betarane, katuntun para dewati, maring puri luwihing warna murub, ring
temboke lintang nguwub, dumilah manik abang, kulawarga sang atma katemu, maka
sami nyapa hyang atma, Sanghyang atma raris ngandika.
2.
Uduh dewa titiang malih
katemu, semeton titiange, dewa malih kacunduk deriki, dahat liang manah,
lintang sueca hyang sinuhun, mapaica puri luih, inggih betara dija malih
puri ne tuhu, titiang meled sauninga, kawentenan hyang betara.
3.
Ida betara raris ngandika
arum, duh dewa sang atma, dasa paneling saking deriki, sakewanten srahina
betara guru, tan mari ida pacang tedun, me mritiaksa yang moksa pada, sapunika
duh sang wawu rawuh, kagiat wenten swaran rebab, tan pegatan ring ambara.
Bremana
Ngisep Sari
1.
Hyang atma tur ngaksi ring
awan, wenten pelinggih luwih, mahias manik surya kanta, luwih asri maring
langit, ngapehang ambu mrik utama, ring langit tedun malujug, dahating asri
manyurarit.
2.
Agelis Sang Atma ngaran Sika,
saksat batis andus yukti, midep ngacep yogan bethara, wantah mraga sarin
semadi, nemuang tiga dados nunggal, Sanghyang Atma luwuhing kukuh, ngerastiti
Sanghyang Widhi.
3.
Singgih Sanghyang Siwanata,
ledang jeng bethara ngaksi, ratu mraga asta guna, ngerahajengang jagat sami, uppeti
stiti muang prelina, ring sehananing tumuwuh, ngawisada dewata sami.
Pupuh
Ginada (eman eman)
1.
Ring pancapita mawisesa,
Hyang Siwa Guru sampun pasti, malih maring ratna yoga, Sakya muki parab
pakulun, ring tata gata sri werocana, wantah yukti, utamaning panca budha.
2.
Duwaning paduka bethara,
pamuputing darmaning luwih, ngewasayang sedagingnya, kangin putih gajah sinangguh,
sampun yukti mapesengan Hyang Iswara.
Pupuh
Ginada Linggar Petak
1.
Ring daksina warna barak,
bethara anglihin paksi, mapesengan Sanghyang Brahma, Maring kulon kuning tuhu,
ngalinggihin nagapasa, kaparabin, wantah Sanghyang Mahadewa.
2.
Maring lor mewarna ireng,
gruda wantah kelingihin, sampun kaloktah ring jagat, keparabin Sanghyang Wisnu,
kelod kangin warna danta, sampun pasti, warak maka pelinggih
3.
Hyang Mahesora parab paduka,
kelod kauh jingga warni, kelod kauh jingga warni, misa maka palinggihan, Sanghyang Rudra kang
sinangguh, Sanghyang Sambu biru warnia, kaje kangin, wilmana maka palinggihan.
4.
Sastra sang, bang, tang,
punika, pragayan hyang duk kastiti, antuk manusa ring jagat, mangda sida molih
ayu, ne kebawos panca brahma, sastra ang, ing, keragayang sang meraga sucia.
5.
Aksara malih lelima, Nang,
Mang, Sing, Wang, Yang, Tan mari, kebaosang dasa aksara, sastra lintang pingit
tuhu, gagelaran sang pradnyan, mangda panggih, margi pacang nekeng suarga.
Pupuh
Sinom
1.
Sampun puput matur sembah,
ring ida sang maha niti, rikalaning sasih kapat, ambun sekar kembang wangi,
para atma garjita mangkin, ring bongkol tarune atub, duwur batune menegak, lega
manah nya mebalih, sekar tunjung, sekar ungu pudak angsana.
2.
Ke asrian sura bwana, tan
wenten sane nyamenin, rika ring tukade linggah, wenten jwa paksi blibis,
tingkah nya ngenyudin hati, nguwuhin manah ulangun, ikekupu ipun bungsang,
nyusur sekar kembang wangi, I kecubung, nenten
ke kasorang.
Pupuh
Durma
1.
Tan kacrita watek kingkirana
prapta, tangkejut wara atma sami, midep katkeng baya, risampune ketatasang,
dewata nitah raksasi, atma presama, mangda menangkil ke puri.
2.
Wara atma garjita tangkil
ngapurian, nangkil ring dewa sami, pacang mapewarah, wara atma trepti pisan,
siaga pacang mamiragi, hyang dewata, raris ngawedarang indik.
3.
Kangin putih irika genah
malingga, sang mraga dana sitti bakti, kelod kangin dadu merunnya, sang kasub
webuh ring jagat, kelod meru abang yukti, sang nlebing tattwa, sanghyang aji
saraswati.
4.
Kelod kauh natan sios meru
jingga, liggih ida sang tresna asih, ring para jana, kawuh meru kuning rika,
purusa ring yuda yukti, uduh dewa, sapunika jwa elingin.
5.
Kaja kauh meru wilis natan
iwang, sang sadu budhi malinggih, teleb ring tapa brta, meru ireng kaja muwah,
sang wicaksana tossing luwih, kaping untat, sane mangkin kelanturin.
6.
Kaja kangin meru jingga
warnan nya, sane patut ngeliggihin, sang pupating darmika, sdaging kahyun
mresidangyang, maring madia manca warni, sang luwihin suci, puput ngalarang
yoga semadi.
Pupuh
Pucung
1.
Sanghyang atma, mretyaksayang
salwir pituduh, sampun sinah pisan, kawentenan sami ngaksi, wantah patut,
kemargian rawuh riwekas.
2.
Antuk kepastu, ring ida
sanghyang sinuhun, duk ring merca pada, tan luputing letuh yukti, alah ayu,
kasupat ring hyang wisesa.
3.
Mangkin tuhu, pengandikan ida
iratu, sanghyang parama wisesa, para atma mangda ngungsi, genah ipun, manut
maring swadarman nya
Puh
Ginada
1.
Kirang langkung aturan titiang,
ring pamiarsa sareng sami, titiang nunas gung ampura, tambet titiang wantah
katur, pangkah nulad sang wicaksana, sampun wyakti, akweh kekirangan titiang.
Maka
penyineb titiang OM SANTIH SANTIH SANTIH OM